Thursday, March 24, 2016

എന്താണ് നിനക്ക് ഞാൻ തരേണ്ടത്‌...

____________________________________________________________

എന്താണ് നിനക്ക് ഞാൻ
നൽകേണ്ടത്...?...
നഷ്ട്ടപ്പെട്ട ഹൃദയതാളതെ
വീണ്ടെടുക്കുവാനായുംപോഴുള്ള
ശൂന്യതയിൽ നഷ്ട്ടപ്പെട്ട ചിരിയോ..

എന്നോ ഉരുകിയൊലിച്ചു പോയൊരു
വേനലിന്റെ വ്യഥയിൽ,
ഇന്നും വിണ്ടുകീറിക്കിടക്കുന്ന
ഹൃദയസമതലത്തിൽ
മണൽക്കാറ്റിനൊപ്പം
അലഞ്ഞുതിരിയുന്ന പ്രജ്ഞയിലെ
അവസാനത്തെ ഒരുതരി വെളിച്ചമോ

ഇനിയും എന്താണ് നിനക്ക് ഞാൻ നൽകേണ്ടത്...?...

പിന്നെ,
നിറയെ മഞ്ചാടിക്കുരുക്കൾ
ഉറങ്ങിയിരുന്ന ഒരു സ്ഫടികപാത്രം
പരുക്കൻ നിലത്തുവീണ് ഉടഞ്ഞത് പോലെ
ചിന്നിചിതറിയ മനസ്സിന് വച്ചുനീട്ടുവാൻ
ചുറ്റിലും ചിതറിത്തെറിച്ച
അവ്യക്‌തമായ
കുറച്ചോർമ്മകൾ മാത്രം....!!!

എന്റെ, ഹൃദയ വ്യഥയുടെ
ഉണങ്ങാത്ത മുറിവുകളിൽ ഓമനിച്ചു
ഞാൻ കാത്തുവച്ചിരിക്കുന്ന
ഓർമകൾക്ക് നിന്നെ വിട്ടുകൊടുക്കാനല്ല.


നിന്നെ ശപിക്കാൻ ഇനിയൊരോർമ പോലും
എന്നിൽബാക്കിയാകാതിരിക്കാൻ


എല്ലാം എന്നോടൊപ്പം
ഒരിത്തിരിപ്പോന്ന ചിതയിലൊടുങ്ങാൻ,
ഇതല്ലാതെ ഞാൻ നിനക്കു
ഇനി എന്താണ് നൽകേണ്ടത്...?

No comments:

Post a Comment